ABŞ-dan İranın neft sektoru ilə bağlı yeni qərar: Lisenziya ləğv edildi
ABŞ-dan İranın neft sektoru ilə bağlı yeni qərar: Lisenziya ləğv edildi
ABŞ Maliyyə Nazirliyinin Xarici Aktivlərə Nəzarət İdarəsi (OFAC) İranın neft, neft-kimya və neft məhsulları ilə bağlı əməliyyatlara tətbiq edilən istisnaları ləğv edib.
OFAC-ın yaydığı yeni qərara əsasən, ötən ayın 21-də verilmiş və İranın xam nefti, neft-kimya məhsulları ilə bağlı əməliyyatlara 60 günlük istisna tanıyan ümumi lisenziya qüvvədən düşüb.
İyulun 7-dən etibarən qadağalar qüvvəyə mindi
Qərarla tənzimlənən yeni qaydalara görə, iyulun 7-dən etibarən İranın xam nefti, neft-kimya və digər neft məhsullarının alınması, yüklənməsi, daşınması və satışı ilə bağlı istənilən yeni əməliyyatlara icazə verilməyəcək.
Keçid dövrü üçün vaxt məhdudiyyəti
OFAC, əvvəlki lisenziya çərçivəsində artıq başlanmış əməliyyatların təhlükəsiz şəkildə tamamlanması və dayandırılması üçün şirkətlərə müəyyən bir vaxt tanıyıb. Bu cür əməliyyatların yekunlaşdırılması üçün 17 iyul 2026-cı il tarixinədək keçid müddəti müəyyən edilib.
Xatırladaq ki, OFAC ötən ay verdiyi ümumi lisenziya ilə İranın neft sektoru ilə bağlı istehsal, satış, daşınma və boşaltma əməliyyatlarına müvəqqəti istisna tətbiq etmişdi. İlkin şərtlərə görə həmin lisenziyanın 21 avqust tarixinədək qüvvədə qalması və əməliyyatların ABŞ dolları ilə aparılmasına imkan verilməsi nəzərdə tutulmuşdu. Lakin yeni qərarla bu müddət vaxtından əvvəl ləğv olunub.
