Londonda Azərbaycanın Müstəqillik Gününə həsr olunmuş rəsmi qəbul təşkil edilib
Londonda Azərbaycanın Müstəqillik Gününə həsr olunmuş rəsmi qəbul təşkil edilib
Böyük Britaniyanın paytaxtı London şəhərində 28 May – Müstəqillik Günü münasibətilə rəsmi qəbul təşkil edilib.
Tədbirdə Azərbaycanın Böyük Britaniyadakı səfirliyinin rəsmiləri, Britaniya parlamentinin üzvləri, dövlət qurumlarının təmsilçiləri, diplomatik korpusun nümayəndələri, eləcə də elm, mədəniyyət və ictimaiyyət xadimləri iştirak ediblər.
Tədbiri giriş sözü ilə açan Azərbaycanın Böyük Britaniyadakı səfiri ölkəmizin keçdiyi tarixi inkişaf yolundan, müstəqilliyimizin bərpasından sonra əldə olunan nailiyyətlərdən bəhs edib. Səfir Azərbaycan-Böyük Britaniya münasibətlərinin strateji tərəfdaşlıq səviyyəsində olduğunu qeyd edərək, iki ölkə arasında siyasi, iqtisadi və mədəni əlaqələrin dinamik inkişafından məmnunluğunu ifadə edib.
Çıxışlarda Azərbaycanın regional və beynəlxalq miqyasda rolu, enerji təhlükəsizliyi sahəsindəki töhfələri, eləcə də mədəniyyətlərarası dialoqun təşviqindəki fəaliyyəti yüksək qiymətləndirilib.
Qəbul çərçivəsində Azərbaycanın zəngin mədəni irsini, tarixi abidələrini və müasir inkişafını əks etdirən foto-stend nümayiş etdirilib. Tədbir qonaqların Azərbaycanın milli mətbəxinin ləziz nümunələri ilə tanışlığı və səmimi söhbətlərlə davam edib.
