Azərbaycan və Özbəkistan Xəzərdə güclərini birləşdirir: Yeni ticarət donanması yaradılır
Azərbaycan və Özbəkistan Xəzərdə güclərini birləşdirir: Yeni ticarət donanması yaradılır
Azərbaycan və Özbəkistan arasında nəqliyyat-logistika sahəsində əməkdaşlıq yeni strateji mərhələyə qədəm qoyub. Tərəflər Xəzər dənizində birgə ticarət donanmasının yaradılması və birgə müəssisənin təsis edilməsi istiqamətində konkret addımlar atır.
Bu barədə Özbəkistanın İnvestisiya, sənaye və ticarət nazirinin müavini Xurram Teşabayev məlumat verib. Onun sözlərinə görə, layihənin reallaşdırılması üçün "Uztemiryulkarqo" ASC ilə "Azərbaycan Xəzər Dəniz Gəmiçiliyi" (ASCO) QSC arasında sıx əməkdaşlıq və birgə fəaliyyət planı davam etdirilir.
Orta Dəhliz üçün strateji əhəmiyyət
Ekspertlər hesab edir ki, bu təşəbbüs Orta Dəhlizin (Transxəzər Beynəlxalq Nəqliyyat Marşrutu) ötürücülük qabiliyyətinin artırılmasında həlledici rol oynayacaq. Mərkəzi Asiya ölkələri üçün dəniz çıxışını və Avropa bazarlarına logistik rahatlığı təmin edən bu marşrut, həmçinin Azərbaycanın regional nəqliyyat qovşağı kimi mövqeyini daha da möhkəmləndirir.
Qeyd edək ki, Azərbaycan və Özbəkistan hökumətləri qarşılıqlı ticarət dövriyyəsini 2030-cu ilə qədər 1 milyard dollara çatdırmağı hədəfləyib. Yaradılması nəzərdə tutulan birgə donanma həm bu hədəfə çatmaq, həm də Mərkəzi Asiya ilə Cənubi Qafqazın iqtisadi inteqrasiyasını dərinləşdirmək üçün strateji alət rolunu oynayacaq.
Hazırda layihənin texniki və hüquqi məsələləri üzərində işlər uğurla davam etdirilir.
