Azərbaycanda İslam bankçılığı xidmətləri genişlənir: 6 milyard dollarlıq müqavilələrin icrasına başlanılır
Azərbaycanda İslam bankçılığı xidmətləri genişlənir: 6 milyard dollarlıq müqavilələrin icrasına başlanılır
Azərbaycanın maliyyə sistemində İslam bankçılığı prinsiplərinə əsaslanan məhsul və xidmətlərin əhatə dairəsi daha da genişləndiriləcək.
Bu barədə Mərkəzi Bankın İcraçı direktoru Şahin Mahmudzadə məlumat verib. O, bildirib ki, hazırda ölkəmizdə alternativ maliyyə alətlərinin tətbiqi istiqamətində sistemli addımlar atılır və İslam bankçılığı məhsullarının çeşidinin artırılması qarşıda duran əsas hədəflərdən biridir.
Ekspertlər bu qərarı və hazırkı inkişaf dinamikasını cari ilin əvvəlində Bakıda keçirilən İslam İnkişaf Bankı (İİB) Qrupunun illik toplantısı ilə əlaqələndirirlər. Xatırladaq ki, həmin mötəbər tədbir çərçivəsində Azərbaycanın dayanıqlı iqtisadi inkişafına dəstək məqsədilə 6 milyard dollar dəyərində mühüm müqavilələr imzalanıb. Hazırkı genişlənmə prosesi məhz bu strateji tərəfdaşlığın və imzalanan sənədlərin praktiki icrasının davamı kimi qiymətləndirilir.
Qeyd edək ki, İslam bankçılığı alətlərinin ölkəmizdə tətbiqi həm də investisiya mühitinin şaxələndirilməsinə və maliyyə inklüzivliyinin artırılmasına töhfə verəcək.
