Bakı beynəlxalq maliyyə dünyasının mərkəzinə çevrilir: QDTİB-in 28-ci İllik Toplantısı keçiriləcək
Bakı beynəlxalq maliyyə dünyasının mərkəzinə çevrilir: QDTİB-in 28-ci İllik Toplantısı keçiriləcək
İyulun 1-2-də Bakı şəhəri Azərbaycanın sədrliyi ilə Qara Dəniz Ticarət və İnkişaf Bankının (QDTİB) Rəhbərlər Şurasının 28-ci İllik Toplantısına və Biznes Forumuna ev sahibliyi edəcək.
Tədbirin gündəliyinə Bankın fəaliyyətinin nəticələrinin nəzərdən keçirilməsi, 2025-ci il üzrə maliyyə hesabatlarının təsdiqi, habelə qurumun gələcək fəaliyyət istiqamətləri və institusional inkişaf məsələləri daxildir.
Biznes Forum: “Bazarların əlaqələndirilməsi, iqtisadiyyatların şaxələndirilməsi”
İllik Toplantı çərçivəsində keçiriləcək Biznes Forumda Azərbaycanın regional iqtisadi qovşaq kimi rolu xüsusi diqqət mərkəzində olacaq. Forumda regional bağlantıların genişləndirilməsi, şaxələndirilmiş maliyyələşdirmə mexanizmlərinin dayanıqlı iqtisadi artıma töhfəsi və Azərbaycanın Avropa ilə Asiya arasında körpü kimi imkanları müzakirə ediləcək. Sahibkarlar və maliyyə institutlarının nümayəndələri arasında ikitərəfli (B2B) görüşlərin keçirilməsi də planlaşdırılır.
Maliyyə sektorunda innovasiyalar: Mərkəzi Bankdan yeni addım
Ölkənin maliyyə sistemində rəqəmsallaşmanı sürətləndirmək məqsədilə Mərkəzi Bank öz fəaliyyətini genişləndirir. Hazırda “Maliyyə sektorunun inkişaf Strategiyası (2024–2026)” çərçivəsində maliyyə sektorunda rəqəmsal yetkinliyin artırılması və innovasiyaların təşviqi istiqamətində ciddi addımlar atılır.
Bununla yanaşı, Mərkəzi Bankın “Sandbox” (xüsusi tənzimləmə rejimi) çərçivəsində innovativ maliyyə məhsullarının sınaqdan keçirilməsi prosesi davam edir. Qurumdan verilən məlumata görə, hazırda innovativ maliyyə həllərinin üçüncü sınaq mərhələsi üzrə müraciətlərin qəbulu başlayıb və bu proses 25 avqust 2026-cı il tarixinədək davam edəcək. Bu rejim, maliyyə xidmətlərinin daha təhlükəsiz və əlçatan olması üçün innovativ texnologiyaların Mərkəzi Bankın nəzarəti altında sınaqdan keçirilməsinə şərait yaradır.
