Prezident İlham Əliyevin sədrliyi ilə dağ-mədən və metallurgiya sənayesinin inkişafına həsr olunmuş müşavirə keçirilib
Azərbaycan Respublikasının Prezidenti İlham Əliyevin sədrliyi ilə ölkədə dağ-mədən və metallurgiya sənayesinin inkişafına dair Dövlət Proqramının icrasına və qarşıda duran hədəflərə həsr olunmuş işgüzar müşavirə keçirilib.
Müşavirədə çıxış edən dövlət başçısı qeyri-neft sektorunun şaxələndirilməsi, sənaye potensialının gücləndirilməsi və yerli xammal bazasının dərin emal əsasında iqtisadi dövriyyəyə cəlb edilməsinin strateji əhəmiyyətini vurğulayıb. Prezident İlham Əliyev dağ-mədən və metallurgiya kompleksinin ölkə ixracatında, eləcə də regionların sosial-iqtisadi inkişafında oynadığı mühüm rola diqqət çəkərək, bu sahədə mövcud potensialdan daha səmərəli istifadə olunması istiqamətində konkret tapşırıqlar verib.
Tədbirdə qəbul edilmiş Dövlət Proqramı çərçivəsində həyata keçirilən layihələr, ekoloji təhlükəsizlik standartlarının təmin edilməsi, müasir texnologiyaların tətbiqi və yeni iş yerlərinin yaradılması məsələləri müzakirə olunub. Eyni zamanda, sənaye müəssisələrinin fəaliyyətinin optimallaşdırılması, idarəetmə mexanizmlərinin təkmilləşdirilməsi və xarici investisiyaların cəlb edilməsi istiqamətində görülən işlər ətrafında geniş fikir mübadiləsi aparılıb.
Müşavirənin sonunda aidiyyəti qurumların rəhbərlərinə Dövlət Proqramında nəzərdə tutulmuş tədbirlərin vaxtında və keyfiyyətlə icrası ilə bağlı müvafiq tapşırıqlar verilib.
