Müdafiə naziri Zakir Həsənov Səlcuq Bayraqdarla görüşüb: Hərbi-texniki əməkdaşlıq müzakirə olunub
Müdafiə naziri Zakir Həsənov Səlcuq Bayraqdarla görüşüb: Hərbi-texniki əməkdaşlıq müzakirə olunub
Azərbaycan Respublikasının müdafiə naziri general-polkovnik Zakir Həsənov ölkəmizdə səfərdə olan Türkiyənin "Baykar" şirkətinin İdarə Heyətinin sədri cənab Səlcuq Bayraqdarın rəhbərlik etdiyi nümayəndə heyəti ilə görüşüb.
Müdafiə Nazirliyindən verilən məlumata görə, görüşdə Azərbaycan ilə Türkiyə arasında strateji müttəfiqlik münasibətlərinin bütün sahələrdə, eləcə də hərbi sahədə uğurla inkişaf etdiyi xüsusi vurğulanıb.
Birgə istehsalat və texnoloji innovasiyalar
General-polkovnik Zakir Həsənov "Baykar" şirkətinin Türkiyənin müdafiə sənayesinin inkişafındakı müstəsna rolunu qeyd edib. Nazir, qabaqcıl texnoloji innovasiyaların tətbiqi və birgə istehsalat potensialının daha da genişləndirilməsinin qarşılıqlı maraq doğurduğunu bildirib.
Hərbi-texniki əməkdaşlığın perspektivləri
Göstərilən qonaqpərvərliyə görə təşəkkürünü bildirən Səlcuq Bayraqdar qarşılıqlı səfərlərin Azərbaycan-Türkiyə hərbi və hərbi-texniki əməkdaşlığının möhkəmlənməsinə mühüm töhfə verdiyini qeyd edib.
Türkiyənin Azərbaycandakı fövqəladə və səlahiyyətli səfiri Birol Akgünün də iştirak etdiyi görüş zamanı tərəflər:
Pilotsuz uçuş aparatlarının (PUA) tətbiqi;
Radioelektron mübarizə vasitələri;
İnsansız sistemlər və digər müasir müdafiə texnologiyaları sahəsində geniş fikir mübadiləsi aparıblar.
Görüş iki ölkə arasında hərbi sənaye sahəsində əlaqələrin daha da dərinləşməsi baxımından mühüm əhəmiyyət kəsb edib.
