18 Oktyabr - Azərbaycanın Müstəqilliyinin Bərpası Günüdür

18/10/2026 - 08:49

Bu gün Azərbaycan xalqının azadlıq və müstəqillik mübarizəsinin ən şərəfli səhifələrindən biri-Müstəqilliyin Bərpası Günü qeyd olunur.

20-ci əsrin sonlarında SSRİ-nin süquta uğraması ilə Azərbaycan xalqı əsrin əvvəlində itirdiyi müstəqilliyini yenidən bərpa etmək fürsəti qazandı. 1991-ci il oktyabrın 18-də Azərbaycan Respublikasının Ali Soveti "Azərbaycan Respublikasının Dövlət Müstəqilliyi haqqında Konstitusiya Aktı"nı qəbul etdi. Bu tarixi sənədlə Azərbaycan Respublikası 1918-1920-ci illərdə mövcud olmuş Azərbaycan Xalq Cümhuriyyətinin varisi olduğunu bütün dünyaya bəyan etdi.

Tarixi Zəmin və Müstəqilliyin Qorunması

Konstitusiya Aktının qəbulu xalqımızın çoxəsrlik dövlətçilik ənənələrinin bərpası idi. Lakin müstəqilliyin ilk illərində ölkəmiz ağır siyasi, iqtisadi böhranla və xarici təcavüzlə üz-üzə qaldı. Yalnız xalqın təkidli tələbi ilə 1993-cü ildə Ümummilli Lider Heydər Əliyevin hakimiyyətə qaytarılmasından sonra Azərbaycanın müstəqilliyi dönməz xarakter aldı, dövlətçiliyin sütunları möhkəmləndirildi.

Qalib Azərbaycan: Zəfərlə Taclanan Müstəqillik

Bu gün Azərbaycan öz müstəqilliyinin ən qüdrətli dövrünü yaşayır. Müzəffər Ali Baş Komandan, Prezident İlham Əliyevin rəhbərliyi və rəşadətli Azərbaycan Ordusunun şücaəti sayəsində torpaqlarımız işğaldan azad edildi, ölkəmizin suverenliyi tam bərpa olundu.

İndi Azərbaycan Respublikası regionun lider dövləti, beynəlxalq aləmdə söz sahibi olan müstəqil və güclü bir aktordur. Azad edilmiş torpaqlarımızda aparılan genişmiqyaslı quruculuq işləri dövlətimizin iqtisadi və siyasi gücünün bariz nümunəsidir.

Əvvəlki məqalə