Paraplanla ölkəyə keçirilən külli miqdarda narkotik aşkarlanıb
Biləsuvarda xüsusi əməliyyat: Paraplanla ölkəyə keçirilən külli miqdarda narkotik aşkarlanıb
Biləsuvar rayonunda polis əməkdaşları tərəfindən həyata keçirilən uğurlu əməliyyat nəticəsində narkotik vasitələrin qanunsuz dövriyyəsinin qarşısı alınıb.
Daxil olan məlumata əsasən, ölkə ərazisinə paraplan uçuş aparatı vasitəsilə qaçaqmalçılıq yolu ilə keçirilən külli miqdarda narkotik vasitə aşkarlanıb. Aparılan yoxlamalar zamanı ümumilikdə 47 kiloqram marixuana və tiryək, eləcə də 10104 ədəd psixotrop tərkibli həb müsadirə edilib.
Polis əməkdaşlarının keçirdiyi əməliyyat-axtarış tədbirləri nəticəsində əvvəlcədən müəyyən edilmiş lokasiya vasitəsilə narkotik vasitələri əldə edən şəxslər saxlanılıb. Araşdırmalarla onların əvvəllər məhkum olunmuş 62 yaşlı Calal Qəhrəmanov və 35 yaşlı Rəşid Məmmədəliyev olduğu müəyyən edilib.
İstintaqla məlum olub ki, saxlanılan şəxslər əldə etdikləri narkotik vasitələri paytaxt Bakı şəhəri ərazisində satışını həyata keçirməyi planlaşdırıblar.
Faktla bağlı saxlanılan şəxslər Rayon Polis Şöbəsinə gətirilib, hazırda araşdırmalar davam etdirilir.
