Azərbaycanda qızıl və gümüş istehsalı azalıb
Cari ilin səkkiz ayı ərzində ölkədə qiymətli metalların istehsal göstəriciləri açıqlanıb.
Dövlət Statistika Komitəsinin məlumatına əsasən, 2026-cı ilin yanvar-avqust ayları ərzində Azərbaycanda 1946,3 kiloqram qızıl istehsal olunub. Bu göstərici ötən ilin müvafiq dövrü ilə müqayisədə 7,9% azdır.
Hesabat dövründə gümüş istehsalında da azalma qeydə alınıb. Belə ki, sözügedən aylarda 2492 kiloqram gümüş istehsal edilib ki, bu da illik müqayisədə 9,3% azalma deməkdir.
Məlumat üçün qeyd edək ki, sentyabr ayının 1-ə olan vəziyyətə görə ölkədə hazır qızıl ehtiyatı qalmayıb, hazır gümüş ehtiyatı isə 1,3 kiloqram təşkil edib.
