Müharibə dünya bazarını silkələdi: Buğdanın qiyməti kəskin bahalaşdı
Müharibə dünya bazarını silkələdi: Buğdanın qiyməti kəskin bahalaşdı
Rusiya ilə Ukrayna arasında davam edən hərbi əməliyyatlar dünya ərzaq bazarına, xüsusilə buğda qiymətlərinə ciddi təsir göstərməkdədir.
Qara və Azov dənizlərində gərginliyin artması, həmçinin tərəflərin bir-birinin logistika və infrastruktur obyektlərinə endirdiyi zərbələr qlobal ərzaq təhlükəsizliyini təhdid altına alır.
Çikaqo birjasında 5%-lik sıçrayış
Son günlər Ukrayna pilotsuz uçan aparatlarının (PUA) Rusiyaya məxsus yük gəmilərini hədəf alması Çikaqo əmtəə birjasında qiymət artımını sürətləndirib. Məlumatlara görə, bu hadisələrdən dərhal sonra birjada buğdanın qiyməti 5 faiz artıb. Rusiyanın cavab olaraq Ukrayna limanlarına raket zərbələri endirməsi isə vəziyyəti daha da mürəkkəbləşdirib.
“Bloomberg”in analitikasına görə, iyulun 6-dan etibarən dünya bazarında buğdanın qiyməti ümumilikdə 13 faiz bahalaşıb. Hazırda 1 buşel buğdanın qiyməti 6,76 dollar, 1 tonun qiyməti isə 248,4 dollar təşkil edir. Statistikaya əsasən, son 9 gün ərzində Ukrayna tərəfindən Rusiya yüklərini daşıyan 116 gəmiyə hücum qeydə alınıb.
İxracatçılar üçün çətinliklər artır
Dünya buğda bazarının əsas oyunçuları olan Rusiya və Ukraynanın qarşılıqlı hücumları tədarük zəncirini pozur:
Rusiyada yanacaq böhranı: Ukrayna PUA-larının Rusiyanın neftayırma zavodlarına endirdiyi zərbələr ölkədə yanacaq çatışmazlığına səbəb olub. Bu problem biçin mövsümündə məhsulun yığılmasını çətinləşdirir.
Ukrayna limanlarının blokadası: Rusiya Ukraynanın liman infrastrukturunu hədəf alaraq, taxıl ixracının qarşısını kəsməyə çalışır.
Ekspertlər qeyd edirlər ki, dünyanın ən böyük buğda ixracatçılarından olan bu iki ölkə arasındakı müharibənin davam etməsi və logistik kanalların bağlanması qlobal bazarda qıtlıq riskini və qiymət artımını daha da dərinləşdirə bilər.
